ಹೊರೆಬ್ ದೊಂಗ್ರಾರ್ ದೆವಾಚಿ ಭೆಟ್; ಎಲಿಶಾಕ್ ಎಲಿಯಾ ಆಪಯ್ತಾ
------------------------
1 ರಾಯ್ / 1 Kings 19: 9-21
-----------------------

9. ರಾತ್ ಸಾರ‍್ಚೆ ಖಾತಿರ್ ತೊ ಥಂಯ್ ಎಕಾ ಭುಂಯಾರಾಂತ್ ಭಿತರ್ ಸರ‍್ಲೊ. ತೆದ್ನಾ ಸರ್ವೆಸ್ಪರಾಚೆಂ ಉತರ್ ತಾಕಾ ಆಯ್ಕುಂಕ್ ಮೆಳ್ಳೆಂ: “ಎಲೀಯಾ, ತುಂ ಹಾಂಗಾ ಕಿತ್ಯಾಕ್ ಆಸಾಯ್?”
10. ತಾಣೆಂ ಜಾಪ್ ದಿಲಿ: “ಹಾಂವ್ ಸರ್ವೆಸ್ಪರಾ, ದಳ್ಬಾರಾಂಚ್ಯಾ ದೆವಾ ಪಾಸತ್ ಉರ್ಬೆನ್ ಭರ‍್ಲಾಂ, ಪೂಣ್ ಇಸ್ರಾಯೆಲಿತಾಂನಿ ತುಜೊ ಸೊಲ್ಲೊ ಸಾಂಡ್ಲಾ, ತುಜ್ಯೊ ವೆದಿ ಮೊಡ್ಲ್ಯಾತ್ ಆನಿ ತುಜ್ಯಾ ಪ್ರವಾದ್ಯಾಂಕ್ ತಲ್ವಾರಿನ್ ಜಿವ್ಶಿಂ ಮಾರ‍್ಲ್ಯಾತ್. ಹಾಂವ್ ಎಕ್ಲೊ ಮಾತ್ರ್ ಉರ‍್ಲಾಂ ಆನಿ ತೆ ಮ್ಹಜೊ ಜೀವ್ ಕಾಡುಂಕ್ ಸೊಧ್ತಾತ್.”
11. ಸರ್ವೆಸ್ಪರಾನ್ ತಾಕಾ ಮ್ಹಳೆಂ: “ಭಾಯ್ರ್ ಸರ್ ಆನಿ ಸರ್ವೆಸ್ಪರಾ ಮುಕಾರ್ ದೊಂಗ್ರಾರ್ ಉಬೊ ರಾವ್.” ಉಪ್ರಾಂತ್ ಸರ್ವೆಸ್ಪರ್ ತೆ ವಾಟೆನ್ ಉತ್ರುನ್ ಗೆಲೊ. ಸರ್ವೆಸ್ಪರಾ ಮುಕ್ಲ್ಯಾನ್ ಏಕ್ ವ್ಹಡ್, ಬಳಿಷ್ಟ್ ಝೊಡ್‌ವಾರೆಂ ಮಾರ‍್ಲೆಂ. ತ್ಯಾ ವಾರ‍್ಯಾನ್ ದೊಂಗರ್ ಫುಟಯ್ಲೆ ಆನಿ ಖಡ್ಪಾಂಚೊ ಚುರೊ ಕೆಲೊ. ಪೂಣ್ ಸರ್ವೆಸ್ಪರ್ ಝೊಡ್‌ವಾರ‍್ಯಾಂತ್ ನಾತ್ಲೊ. ಝೊಡ್‌ವಾರ‍್ಯಾ ಉಪ್ರಾಂತ್ ಭುಂಯ್‌ಕಾಂಪ್ ಜಾಲಿ. ಪೂಣ್ ಸರ್ವೆಸ್ಪರ್ ಭುಂಯ್‌ಕಾಂಪಿಂತ್ ನಾತ್ಲೊ.
12. ಭುಂಯ್‌ಕಾಂಪಿ ಉಪ್ರಾಂತ್ ಉಜೊ ಆಯ್ಲೊ. ಪೂಣ್ ಸರ್ವೆಸ್ಪರ್ ಉಜ್ಯಾಂತ್ ನಾತ್ಲೊ. ಉಜ್ಯಾ ಉಪ್ರಾಂತ್ ಏಕ್ ಹಳೂ, ಲ್ಹಾನ್ ಆವಾಜ್ ಆಯ್ಕಲೊ.
13. ಹೊ ಆಯ್ಕತಚ್ ತಾಣೆಂ ದಗ್ಲ್ಯಾನ್ ಆಪ್ಲೆಂ ತೊಂಡ್ ಧಾಂಪ್ಲೆಂ ಆನಿ ಭಾಯ್ರ್ ಸರುನ್ ತೊ ಭುಂಯಾರಾಂತ್ ಭಿತರ್ ಸರ‍್ಚೆ ಕಡೆ ರಾವ್ಲೊ. ಎಕಾ ತಾಳ್ಯಾನ್ ತಾಕಾ ಮ್ಹಳೆಂ: “ಎಲೀಯಾ, ತುಂ ಹಾಂಗಾ ಕಿತ್ಯಾಕ್ ಆಸಾಯ್?”
14. ತಾಣೆಂ ಜಾಪ್ ದಿಲಿ: “ಹಾಂವ್ ಸರ್ವೆಸ್ಪರಾ, ದಳ್ಬಾರಾಂಚ್ಯಾ ದೆವಾ ಪಾಸತ್ ಉರ್ಬೆನ್ ಭರ‍್ಲಾಂ. ಪೂಣ್ ಇಸ್ರಾಯೆಲಿತಾಂನಿ ತುಜೊ ಸೊಲ್ಲೊ ಸಾಂಡ್ಲಾ, ತುಜ್ಯೊ ವೆದಿ ಮೊಡ್ಲ್ಯಾತ್ ಆನಿ ತುಜ್ಯಾ ಪ್ರವಾದ್ಯಾಂಕ್ ತಲ್ವಾರಿನ್ ಜಿವ್ಶಿಂ ಮಾರ‍್ಲ್ಯಾತ್. ಹಾಂವ್ ಎಕ್ಲೊ ಮಾತ್ರ್ ಉರ‍್ಲಾಂ, ಆನಿ ತೆ ಮ್ಹಜೊ ಜೀವ್ ಕಾಡುಂಕ್ ಸೊಧ್ತಾತ್.”
15. ಸರ್ವೆಸ್ಪರಾನ್ ತಾಕಾ ಮ್ಹಳೆಂ: “ದಮಾಸ್ಕಾ ಲಾಗಿಂ ಆಸ್ಲಲ್ಯಾ ಅರಣ್ಯಾಕ್ ಪಾಟಿಂ ವಚ್. ಥಂಯ್ ಪಾವ್ತಚ್, ಹಜಾಯೆಲಾಕ್ ಅರಾಮಾಚೊ ರಾಯ್ ಕಸೊ ಅಭಿಷೆಕ್ ಕರ್.
16. ಉಪ್ರಾಂತ್ ನಿಮ್ಶಿಚ್ಯಾ ಪುತಾ ಜೇಹುಕ್ ಇಸ್ರಾಯೆಲಾಚೊ ರಾಯ್ ಕಸೊ ಅಭಿಷೆಕ್ ಕರ್ ಆನಿ ತುಜ್ಯಾ ಜಾಗ್ಯಾರ್ ಪ್ರವಾದಿ ಜಾಂವ್ಚ್ಯಾಕ್ ಆಬೆಲ್-ಮೆಹೋಲಾಚ್ಯಾ ಶಾಪಾಟಾಚ್ಯಾ ಪುತಾ ಎಲೀಶಾಕ್ ಅಭಿಷೆಕ್ ಕರ್.
17. ಹಜಾಯೆಲಾಚೆ ತಲ್ವಾರಿಕ್ ಕೊಣ್‌ಯೀ ಚುಕೊನ್ ವಚತ್ ಜಾಲ್ಯಾರ್, ಜೇಹು ತಾಕಾ ಜಿವ್ಶಿಂ ಮಾರ‍್ತಲೊ. ತೊ ಜೇಹುಚೆ ತಲ್ವಾರಿಕ್ ಚುಕೊನ್ ವಚತ್ ಜಾಲ್ಯಾರ್, ಎಲೀಶಾ ತಾಕಾ ಜಿವ್ಶಿಂ ಮಾರ‍್ತಲೊ.
18. ತರೀ ಹಾಂವ್ ಇಸ್ರಾಯೆಲಾಂತ್ ಸಾತ್ ಹಜಾರ್ ಮನ್ಶಾಂಕ್ ಉರುಂಕ್ ದಿತಲೊಂ, ಮ್ಹಣ್ಜೆ ಬಾಲಾ ಮುಕಾರ್ ದಿಂಬಿ ಬಾಗ್ವಯ್ನಾತ್ಲಲ್ಯಾ ವಾ ತಾಚೊ ಉಮೊ ಘೆನಾತ್ಲಲ್ಯಾ ಸಕ್ಟಾಂಕ್.

ಎಲೀಶಾಚೆಂ ಆಪೊವ್ಣೆಂ
19. ಎಲೀಯಾ ಭಾಯ್ರ್ ಸರ‍್ಲೊ ಆನಿ ತಾಕಾ ಶಾಫಾಟಾಚೊ ಪೂತ್ ಎಲೀಶಾ ಮೆಳ್ಳೊ. ಹೊ ಬಾರಾ ಬಯ್ಲಾಂಚಿಂ ಜೊತಾಂ ಘೆವ್ನ್ ಕೊಸ್ತಾಲೊ ಆನಿ ಬಾರಾವೆಂ ಜೊತ್ ತಾಣೆಂಚ್ ಧರ್‌ಲ್ಲೆಂ. ಎಲೀಶಾ ತಾಚೆಶಿಂ ಗೆಲೊ ಆನಿ ತಾಣೆಂ ಆಪ್ಲೊ ಶೆಲೊ ತಾಚೆರ್ ಘಾಲೊ.
20. ಎಲೀಶಾನ್ ಬಯ್ಲಾಂಕ್ ಥಂಯ್ಚ್ ಸೊಡ್ಲೆ ಆನಿ ತೊ ಎಲೀಯಾ ಪಾಟ್ಲ್ಯಾನ್ ಗೆಲೊ. ತಾಣೆಂ ಮ್ಹಳೆಂ: “ದಯಾ ಕರುನ್ ಪಯ್ಲೆಂ ಮ್ಹಜ್ಯಾ ಬಾಪಾಯ್ಕ್ ಆನಿ ಮ್ಹಜೆ ಆವಯ್ಕ್ ಉಮೊ ದಿಂವ್ಕ್ ಸೊಡ್ ಆನಿ ಉಪ್ರಾಂತ್ ಹಾಂವ್ ತುಜೆ ಪಾಟ್ಲ್ಯಾನ್ ಯೆತಲೊಂ.” ಎಲೀಯಾನ್ ಜಾಪ್ ದಿಲಿ: “ವಚ್, ಪೂಣ್ ಪಾಟಿಂ ಯೆ! ಕಿತ್ಯಾಕ್ ಹಾಂವೆಂ ತುಕಾ ಕಿತೆಂ ಕೆಲೆಂ ಮ್ಹಣ್ ತುಂ ಜಾಣಾಂಯ್.”
21. ಎಲೀಶಾ ತಾಚೆ ಸರ್ಶಿಲೊ ಗೆಲೊ ಆನಿ ಆಪ್ಲ್ಯಾ ಜೊತಾಚೆ ಬಯ್ಲ್ ಘೆವ್ನ್ ತಾಣೆಂ ತೆ ಜಿವ್ಶಿಂ ಮಾರ‍್ಲೆ. ಜುಂ ಜಳವಾಕ್ ಉಪಯೋಗ್ ಕರುನ್ ತಾಣೆಂ ತಾಂಚೆಂ ಮಾಸ್ ರಾಂದ್ಲೆಂ ಆನಿ ಆಪ್ಲ್ಯಾ ಲೊಕಾಕ್ ಖಾಂವ್ಕ್ ದಿಲೆಂ. ಉಪ್ರಾಂತ್ ತೊ ಉಟ್ಲೊ, ಎಲೀಯಾ ಪಾಟ್ಲ್ಯಾನ್ ಗೆಲೊ ಆನಿ ತಾಚಿ ಸೆವಾ ಕರುಂಕ್ ಲಾಗ್ಲೊ.