Jamita Minggu VI Dung Trinitatis
24 Juli 2022
Hosea 1:2-9
“Debata na satia di bagasan holongNa”

Ilustrasi: Adong ma sahalak Ama mansai holong situtu rohana (sangat mencintai) inantana. Nang pe godang do hahurangan ni inanta i rupani, isarana: beteng, remeng, toe tuit do inanta i, pangalahona pe sipata mambahen jut roha ni amanta i, olo marjuji jala olo mabuk rap dohot angka donganna. Tarbalik ma tutu, inanta i do na marpangalaho na humurang, hape amantana mansai burju. Alai tongtong do holong roha ni amanta i, pola sampe dibasabasahon Tuhan i do 3 iananghon di nasida. Di sada tingki, hona sahit tumor otak do inanta i gabe ndang normal be marpingkir jala jotjot berbuat aneh-aneh. Jotjot do gabe hailaon pangalahona.
Ibotona mandok: “Toe ma ito, siranghon ma tagonan, i na ma dalan na dumenggan” ninna. Alai nang pe songon i angka pandapot ni halak, bertahan do amanta i manjaga dohot merawat inantana. Sabar do ibana huhut manghirim boi malum sahit ni inantana, jala boi muba rohana. Adong muse donganna mandok: “ai haotoon na ma huida na binahenmon bah, ndang holong be i; ai tong do molo malum pe sahitna, alai anggo pangalahona nga maol be muba, tong do mambahen maila ho”. Ima dipandok jolma tu ibana. Lak so adong do nanggo sahalak pe donganna manang tetangga manang tondongna na mangalehon semangat tu ibana.
Holan on do alusna: “Inantangku do ibana, inang ni gellengku, ibana do dipatongon Tuhan i na gabe rongkap ni tondingku. Ingkon patureonhu do ibana.”
Laos hohom be do jolma na mambege alusna on, benar-benar salut di hasatiaon ni amanta i tu inantana.
Diujung ngolu ni inanta i marpungu ma sude keluarga, didok ma tu amantana: “Ai ndang tama ahu hape gabe ripem, manang boha pe pangalahongku satia do ho manghaholongi ahu; ndang tarbaloshon ahu holongmi tu ahu. Ahu mangido maaa…aafff….” Dialusi amanta ma: “Nunga diasii Tuhan i ho inang”. Dung dibege hata i laos marujung ma ngoluna, tumatangis ma amantana dohot gellengnasida, suang songon i na torop i pe gabe tumatangis; sude mandok: “Nunga diasii Tuhan i ho inang.”

Impola ni sarito on ima: Hasatiaon na so marbatas, hasatiaon na murni. Boasa boi amanta i satia manghaholongi ripena i nang pe humurang pangalahona jala sipaturehon do ala parsahitonna??? Hombar tu alusna na parpudi i do: “Nunga diasii Tuhan i ho”. Ternyata, mangasahon asi ni roha ni Tuhan i do ibana manghaholongi inantana.

Turpuk jamita Minggu on sian Hosea 1:2-9, konteksna ima: Bangso Israel mengalami krisis kesetiaan iman maradophon Debata. Dibahen nasida do sogo ni roha ni Debata marhite na marsomba tu debata ganaganaan, jala parange nasida pe dihagigihon Debata do. Marbalik nasida sian Debata, sandok lumlam ma tutu haporseaonna. Disegai nasida padanna maradophon Debata. Pola do digombarhon Debata parsaoranNa tu bangso i songon parsaripeon ni si Hosea dohot si Gomer.
Hosea ima panurirang na nijou ni Debata di hamamasa kebobrokan ni pangalaho dohot kemerosotan moral ni bangso Israel. Alanii tugas ni si Hosea mansai borat, bahkan cenderung di luar akal manusia. Didok Jahowa tu si Hosea: “Laho ma ho, buat ma sada boruboru sibabijalang dohot angka tubu ni sibabijalang! Ai sai didatdati isi ni tano i do marmainan, marbalik sian Jahowa.” (ayat 2).
Sahalak panurirang disuru mambuat boruboru sibabijalang na margoar si Gomer. Sabintas… aneh do tahilala parsuruon ni Tuhan on. Molo pe nian disuru Jahowa naposoNa mangoli, nda mambuat boru na burju ma, na daulat, jala na satia??? Boasa si Gomer dioli si Hosea??? Hape si Gomer ima boruboru na so satia, pola sampe didok si Hosea: “Sai badai hamu ma inamuna! Ai ndang ibana jolmangKu, Ahu pe ndang harajaanNa” (Hosea 2:4; versi Alkitab Hosea 2:1). Alai manang boha pe ditubuhon si Gomer do tolu anak di si Hosea, ima margoar: si Jesreel (Debata manguhum), si Lo-Ruhama (Naso hinasian), dohot Lo-Ami (Ndang bangso ni Debata ho).
Hosea ima gombaran HASATIAON NI DEBATA DI BAGASAN HOLONGNA. Songon si Hosea na dihianati si Gomer, alai tongtong do holong rohana; songon i do Debata maradophon bangsoNa, nang maradophon hita. Tongtong do Debata satia manghaholongi hita, nang pe mardosa hita. Taida ma pembuktianna, ima: Na muba lapatan goar ni anakna ni si Hosea na tolu i: Si Jesreel na didok : Debata manguhum, muba gabe Debata na manabur; si Lo-Ruhama marlapatan Nasohinasian, muba gabe Na niasian; suang songon i si Lo-Ami na marlapatan: Ndang bangsongKu ho ninna Debata, muba gabe “Bangsongku do ho, jala dohononmu ma: Ale Debatangku” (Hosea 2:25; versi Alkitab Hosea 2:22).
Antong, penekanan ni jamita on di hita, ima: PATUDUHON HASATIAON NI DEBATA DI BAGASAN HOLONGNA. Hita do bangso na so satia i, na manadinghon dalan ni Debata; alai ditopot Debata do hita, gariada diangkat hita gabe bangso na niasianNa. Saluhutna i, dipatupa Debata marhite Jesus Kristus, na mangalehon hosaNa humonghop hita pardosa; asa muba hita marpangalaho hombar tu lomo ni rohaNa.

Salam Sejahtera, Salam Sahabat, Salam Sehat.

#jamitaminggu24juli2022
#hosea1:2-9