#JamitaMinggu
#KhotbahMingguIni
#2Samuel1:17-27
#ParhahamaranggionDibagasanHolong
#Jamita2Samuel1:17-27
#JamitaMinggu@HaposanHutapea
Hamu angka dongan adong do sada pandohan na mandok songonon: dao do ummura mangalului 1000 halak alo, sian na mangalului 1 halak aleale… pandohan i marlapatan paboa na tung maol do mangalului dongan, jala pandohan i pabotohon na tung mansai taharingkothon do halak na asing di ngolunta on, ndang boi so mardongan hita. Turpuk jamita di minggu on ima sada ende andung-andung ni raja Daud hinorhon ni barota habot ni roha disiala naung marujung ngolu ni raja Saul dohot alealena si Jonathan uju marporang maradophon halak Pilistim. Asa lam tangkas pangantusionta di turpuk on, denggan do jahaonta mamungka sian ayat 1. Nang pe sogo roha ni raja Saul tu si Daud, alai ndang gabe las roha ni si Daud umbege naung marujung ngolu ni raja Saul, baliksa manmgandungi do ibana ala ni si Saul dohot si Jonathan. Laos diendehon sada ende andung, ima na laos gabe turpuk jamita di ombas on. Hamu angka dongan, dibagasan ende andung-andung i, pola do digorahon tolu hali hata andung: Magoponai, tung marragean angka ulubalang! Jumpangta doi di ayat 19, 25,27. Sada panghilalaan na tung mansai dokdok do dihilala raja Daud ditingki i, ala nunga magoan ibana di raja na pinarsangapanna, dohot sahalak aleale na hinaholonganna ima si Jonathan. Ditingki na sai laon, tung mansai solhot situtu do paralealeon ni Raja Daud dohot si Jonathan anak ni raja Saul. Mansai arga do didok roha ni si Daud angka pambahenan ni si Saul dohot si Jonathan, pola ingkon mate nasida di parproangan i, holan humongkop bangso Israel. Angka na hinaholongan jala hasudungan ni roha do nasida na dua. Tung mansai solhot si tutu do paralealean nasida, alai ingkon marsirang do nasida ala ni hamatean. Aha na pinanghilalahon ni raja Daud, dos mai songon pandohan di sada umpama: "Manuk ni pea langge, Hotek-hotek lao marpira. Molo sirang namaraleale, lobianan namatean ina"


Hamu angka dongan adong do sarito na marimpola, taringot tu huinaringkot ni pature parhamaranggion na ginohan ni holong:
Adong ma dua halak na marhahamaranggi na rap maringan di sada huta. Ia ulaon nasida martani do. Dimulanai sian na dakdanak tung mansai uli do parhahamaranggion nasida, alai disada tingki surmar ma sudena i, hinorhon ni parasingan ni pandapot, sasintongna ndang na pola boar nian, alai gabe sada parbadaan bolon doi. Ala ni i gabe ndang mamrsipangkulingan be nasida, huhut sai marsipasidingan, ndang lomo be roha nasida pajumpang. Ujungna disangkapi sianggian ma asa dao sada ulaon sipatupaon asa unang boi jumpang dohot hahana i. Dibahen ibana ma batas ni tanona dohot haha nai, sian na manghali i mansai bagas jala bidang, laso dipadalan ma aek tusi, tudoshon songon sunge na mansai balga. Didok rohana tung na so jadi marsilaosan dohot hahana i. Marnida na masa i tarrimas ma sihahaan i, dijou ma tukkang disuru ma pauli pagar na tung mansai timbo, asa unang boi ditatap dompak porlak ni angina i. Dung dituhor sude angka na ringkot, dipasombu ibana ma tungkang i martungkang pauli pagar na timbo. Dung piga ari didok tukang ima tu ibana nunga sae ulaonna. Diida si hahaan ima aha songon dia na niula ni tukang, alai tarsonggot situ ibana, ala ndang adong pagar na timbo, baliksa gabe dipauli tukang ido sada jambatan na tung denggan situtu laho manaripari sunge na binahen ni anggina i. Dang piga leleng nai diida ibana ma marlojong angina i, mamolus jambatan i, huhut didapthon sihahaan i, jala dihaol, huhut tumatangis ibana. Didok ma songonon: Tung mansai uli situtu do roham, pola do dipauli ho jambatan on. Hape nga na roa husangkapi, asa dao hita, nga hancit roham hubaen. Ala ni i marpamuati ma roham di ahu. Mamungka sian i gabe mardenggan ma muse nasida. Dinalaho borhat tukang i didok nasida do asa tading disi tukang i, alai diodok tukang ido? Godang dope ulaonna na asing, lahopauli angka jambatan
Hamu angka dongan, sorminan ni sarito i, songon do: ia si 2 halak i ima hita, dohot angka donganta, hahangginta, na sipata denggan jala sipata marsalisi. Olo do hita marsalisi, sai tasangkapi angka na roa. Ndang olo patalu roha, nang olo mardenggan . Alai tukang na ro paulihon jambatani, ima Tuhanta Jesus, na ro mandapothon hita dibagsan Tondia Parbadia, mnagajari hita asa mardame. Ibana do na pauli jambatan i asa mardame hita, asa marsitomuan hita dohot angka donganta jolma. Asa sian sarito i dipaingot do hita di hinaarga ni parhahamaranggion na ginohan ni holong, nai olo dipadame, na olo dipasada, ndang sai lalap tarrimas, manang mian dibagasan hosom.Asa marhite on naeng ma marsiadu hita laho patupahon holong parhahamarangion. Songon Tuhanta Jesus na ro manghaholongi hita, songoni ma hita mangahholongi donganta jolma i, angka na marhahamaranggi do hita sude dibagasan holong ni Kristus iTuhanta Jesus ma tiruanta laho marholong ni roha. Amen.